रामपुरमा कानको उपचार सेवा शुरू

बुलेटिन संवाददाता
१५ आश्विन २०७६, बुधबार १४:०३

१५ असोज, बेझाड । पाल्पाको रामपुरमा सञ्चालित कालीगण्डकी आँखा उपचार केन्द्रले कानको उपचार सेवा शुरू गरेको छ ।

आँखा उपचार सेवा दिँदै आइरहेको केन्द्रले मंगलवारबाट कानको उपचार सेवा थप गरेको हो । सेवाको रामपुर नगरपालिकाका उपप्रमुख विष्णुदेवी घिमिरे आचार्यले शुभारम्भ गरे ।

उनले यस क्षेत्रको लागि यो सेवा अति आवश्यक रहेकाले नगरपालिकाले पनि कान उपचार सेवालाई प्राथमिकतामा राखेर सहयोग गर्ने बताए । कान उपचारको लागि छुट्टै सेवा रामपुरमा नहुँदा सदरमुकाम तानसेनलगायत अन्यत्र ठाउँमा बिरामी जानुपर्ने अवस्था छ ।

रामपुरमै सहजरुपमा आँखा जाँचसँगै कानको उपचार सेवा दिने उद्देश्यले थप सेवा विस्तार गरेको केन्द्रका अध्यक्ष हुतराज पोखरेलले बताए ।

दैनिक आँखा जाँच तथा उपचार, मासिक शल्यक्रिया हुँदै आएकोमा अब कानको अप्रेसन बाहेक अन्य उपचार थप भएको उपचार केन्द्रका प्रमुख सुन्दर रानाले जानकारी दिए ।

झोलाबाट शुरू भएको आँखा उपचार केन्द्रले अहिले आफ्नै सुविधा सम्पन्न भवनबाट आँखा जाँच सेवासँगै कानको उपचार सेवा शुरू गरेको हो । केन्द्रले कालीगण्डकी बेंसीका पाल्पा, स्याङ्जा, तनहुँ र नवलपुर लगायतका नागरिकलाई सेवा दिँदै आएको छ ।

शल्यक्रिया सहितको आँखा जाँच तथा कानको उपचार सेवा पाइने हुँदा नागरिकलाई ठूलो राहत पुगेको स्थानीय लक्ष्मी पौडेलले बताए ।