सरकारले सबै क्षेत्रसँगको साझेदारीमा जोड दिएको छ : अर्थमन्त्री खतिवडा

बुलेटिन संवाददाता
२७ भाद्र २०७६, शुक्रबार १८:१३

२७ भदौ, काठमाडौं । अर्थमन्त्री डा. युवराज खतिवडाले दिगो विकास लक्ष्य हासिल गर्न पनि सरकारले सबै क्षेत्रसँगको साझेदारी कार्यक्रममा जोड दिएको बताएका छन् ।

अर्थमन्त्री खतिवडाले दिगो विकास लक्ष्य हासिल गर्न महिला तथा युवा उद्यम विकासलाई पनि सरकारले उच्च प्राथमिकता दिएको स्पष्ट दाबी गरे ।

शुक्रबारदेखि काठमाडौंमा सुरु भएको ‘अन्तर्राष्ट्रिय महिला उद्यमी शिखर सम्मेलन’को उद्घाटन गर्दै उनले मुलुकको आर्थिक समृद्धिका लागि उद्यम विकास गर्न पनि सरकारले सर्वसाधारण नागरिकलाई समेत उद्यम क्षेत्रमा सहभागी गराउन सक्दो पहल गरिरहेको बताए ।

अर्थमन्त्री खतिवडाले महिलाहरुलाई उद्यमशील बनाउन उनीहरुलाई जमिनमाथिको स्वामित्व स्थापित गराउन कानुन बनाउने कामलाई पनि तीव्रता दिइएको बताए ।