यू-१९ एसिया कप : नेपालको लगातार दोस्रो हार, सम्भावना लगभग समाप्त

बुलेटिन संवाददाता
२२ भाद्र २०७६, आईतवार १७:३०

२२ भदौ, काठमाडौं । एसीसी यू–१९ एसिया कप क्रिकेट प्रतियोगिता अन्तर्गत आफ्नो दोस्रो खेलमा पनि पराजित भएपछि नेपालको अघिल्लो चरण पुग्ने सम्भावना लगभग समाप्त भएको छ ।

आइतवार भएको खेलमा नेपाल बंगलादेशसँग ६ विकेटले पराजित भयो । नेपालले पेश गरेको २ सय ६२ रनको चुनौती बंगलादेशले ४ बलअगावै ४ विकेट गुमाएर पूरा गर्‍यो ।

बंगलादेशको जितमा महत्त्वपूर्ण इनिङ खेलेका कप्तान अकबर अलि अविजित शतक बनाउनबाट मात्र २ रनले चुके ।

नेपालका लागि कमलसिंह ऐरीले २ तथा रसिद खान र हरि चौहानले १र१ विकेट लिए ।

यसअघि श्रीलंकाको कोलम्बोमा टस हारेर पहिले ब्याटिङको निम्तो पाएको नेपालले निर्धारित ५० ओभरमा ८ विकेट गुमाएर २ सय ६१ रन जोडेको थियो ।

नेपाललाई सम्मानजनक स्कोरसम्म डोहोर्‍याउने क्रममा पवन सर्राफ र सन्दीप जोराले सानदार अर्धसतकीय पारी खेले । पवनले ८१ रनको योगदान गर्दा सन्दीपले ५६ रन जोडे ।

यसका अलावा रित गौतमले ३२, कुशल मल्लले २८, भीम सार्कीले २१ र कप्तान रोहित पौडेलले १४ रन जोडेको पारीमा अन्य ब्याट्सम्यानले दोहोरो अंकमा रन जोड्न सकेनन् ।

पहिलो खेलमा नेपाल घरेलु टोली श्रीलंकासँग पराजित भएको थियो । बंगलादेशले भने युएईलाई पराजित गरेको थियो ।