कुलमान कुर्लेपछि कुलेखानी तेस्रोको परीक्षण खुरुखुरु

बुलेटिन संवाददाता
२७ जेष्ठ २०७६, सोमबार ००:४९
?????????????????????????????????????????????????????????

२७ जेठ, काठमाण्डौ । कुलेखानी जलविद्युत आयोजनाको उपकरण परीक्षण सुरु भएको छ ।

१४ मेगावाट क्षमताको कुलेखानी तेस्रो जलविद्युत आयोजनाको पहिलो युनिटमा आइतबारदेखि पानी पठाएर उपकरण परीक्षण अर्थात नो लोड परीक्षण सुरु भएको छ । १४ मेगावाटमध्ये ७ मेगावाटको पहिलो युनिटको विद्युतगृहमा आइतबारदेखि पानी पठाएर उपकरण परीक्षण सुरु भएको आयोजनाले जनाएको छ । परीक्षण उत्पादन भने अर्को हप्तादेखि गरिने आयोजनाको दावी छ ।

गएको वैशाख २९ गते आयोजनास्थलमै पुगेर नेपाल विद्युत प्राधिकरणका कार्यकारी निर्देशक कुलमान घिसिङले कुलेखानी तेस्रोको काममा थप ढिलाइ भएमा ठेकेदारलाई कालोसूचीमा राख्ने चेतावनी दिएका थिए । घिसिङले आयोजनास्थलबाटै भारतमा रहेका हुलास इन्जिनियरिङ एण्ड कन्ट्रक्सनका शरद गोल्छालाई फोन गरेर निर्माणमा लापरबाही गरेमा कालोसूचीमा राख्ने चेतावनी दिएपछि कामले गति लिएको थियो ।

यस्तो परीक्षणमा सुरुङबाट आएको पानीलाई पेनस्टक पाइप हुँदै विद्युत गृहमा रहेको टर्बाइनमा झारिन्छ र त्यसबाट जेनेरेटर, कन्ट्रोल प्यानेल लगायतका उपकरणहरु डिजाइन अनुसार चले(नचलेको हेरिन्छ । विद्युत् भने उत्पादन हुँदैन ।

आयोजनाले कुलेखानी जलाशयको नियन्त्रित बहाव र खानीखोलाको थप पानी प्रयोग गर्नेछ । कुलेखानी तेस्रो, कुलेखानी पहिलो र दोस्रो आयोजनाको क्यास्केड आयोजना हो । नेपाल सरकार र विद्युत प्राधिकरणको लगानीमा निर्माण भइरहेको हो ।

आयोजनाको सुरुको लागत २ अर्ब ३३ करोड रुपैयाँ थियो भने निर्माण अवधि बढेसँगै आयोजनाको लागत ४ अर्ब ६३ करोड रुपैयाँ पुग्ने संशोधित अनुमान छ ।