ऐतिहासिक राधाकृष्ण रथयात्रामा सार्वजनिक बिदा

बुलेटिन संवाददाता
११ भाद्र २०७५, सोमबार २२:४८

१२ भदौ, बिराटनगर । प्रदेश नं १ सरकारले श्रीकृष्ण जन्माअष्टमीको भोलिपल्ट विराटनगरमा निकालिँदै आएको ऐतिहासिक राधाकृष्ण रथयात्राको दिन प्रदेश १ मा सार्वजनिक बिदाको घोषणा गरेको छ ।

सो राधाकृष्ण रथयात्राको सम्पूर्ण तयारी पूरा भएको छ । विगत वर्ष झैँ यस वर्ष पनि भव्य र धुमधामका साथ निकालिने रथयात्रा व्यवस्थापन समितिद्वारा सोमबार यहाँ आयोजित पत्रकार सम्मेलनमा जनाइएको छ ।

रथ यात्रा भव्यतापूर्ण सम्पन्न गर्न विभिन्न १९ वटा उपसमिति निर्माण गरेको समितिका अध्यक्ष बाबुराजा ओझाले जानकारी दिए । अध्यक्ष ओझाले विराटनगरस्थित राधाकृष्ण मन्दिरबाट यही भदौ ं१८ गते निकालिने रथयात्राले शहरको विभिन्न भाग हँदै सात किलोमिटर परिक्रमा गरी पुनः मन्दिर परिसरमा आएर रथयात्रा विसर्जन हुनेछ ।

रथयात्रा सञ्चालनका लागि मुख्य मार्गको ४३ स्थानमा विश्रामस्थल तय गरिएको छ । रथयात्रा समारोह समितिका अनुसार भदौ १८ गते निकालिने रथयात्रामा रथ प्यागोडा शैलीको बनाइएको छ ।

रथको लम्बाई २२ फिट, चौडाई १४ फिट र उचाई १८ फिट रहेको छ । रथको अग्रभाग जुवाबाट ७५ फिट लम्बाईका दायाँबायाँ पट्टि फैलिएका लठ्ठा डोरीको माध्यमबाट रथ तानिने व्यवस्था रहेको हुन्छ ।

त्यसैगरी रथले तय गर्ने मार्गमा हेलिकप्टरबाट पुष्पगुच्छा वर्षाइने जनाईएको छ ।

रथयात्राको अवलोकन गर्न नेपाल र भारतकाका लाखौँ भक्तजन विराटनगर आउने गर्दछन् । प्रदेश सरकार निर्माणसँगैे रथ यात्राको उद्घाटन प्रदेशका मुख्यमन्त्री शेरधन राईले गर्नेपत्रकार सम्मेलनमा जनाइएको छ ।

यसैबीच स्व पोखरमल राठीको स्मृतिमा राठी परिवारबाट स्थापित पोखरमल धर्मसंस्कृति पुरस्कार यो वर्ष विराटनगर–३ स्थित परोपकार अभियान समूहलाई प्रदान गरिने भएको छ ।

श्री राधाकृष्ण रथयात्रा समारोह समितिको मातहतमा रहेको पुरस्कारको राशि रु एक लाख एक हजार रहेको छ । यो पुरस्कार प्रत्येक वर्ष रथयात्रा निकाल्नुभन्दा अघि विशेष धार्मिक कार्यक्रमको आयोजना गरी वितरण गर्दै आएको छ ।