राष्ट्रिय सूचना तथा सञ्चार प्रविधि दिवसमा प्रभातफेरी र अन्तरक्रिया

पाल्पा, १९ बैशाख
राष्ट्रिय सूचना तथा सञ्चार प्रविधि दिवस (आसीटि डे) को अवसरमा पाल्पाको तानसेनमा प्रभातफेरी र अन्तरक्रिया कार्यक्रम सम्पन्न भयो ।

‘डिजिटल नेपाल : विकास र समृद्धिको आधार’ भन्ने नारासहित कम्प्युटर एशोसियशन अफ नेपाल (क्यान महासंघ) पाल्पाले प्रभातफेरी र अन्तरक्रिया कार्यक्रम सम्पन्न गरेको हो । राष्ट्रिय सूचना तथा सञ्चार प्रविधि दिवसको अवसर पारेर नेपाल सरकार सञ्चार तथा सूचना प्रविधि मन्त्रालयको आयोजनामा देशभरका ५७ शाखाका विभिन्न कार्यक्रम गर्ने सन्दर्भ बमोजिम पाल्पा पनि कार्यक्रम आयोजना गरिएको हो ।

तानसेनका विभिन्न स्थानको परिक्रमा प्रभातफेरी तानसेन टुँडीखेलस्थित होटल डायमण्डको सभाकक्षमा अन्तरक्रिया कार्यक्रमको आयोजना गरिएको थियो । कार्यक्रमका प्रमुख अतिथि तानसेन नगरपालिकाका प्रमुख अशोककुमार शाहीले सूचना प्रविधिको क्षेत्रमा सचेतना बढाउँदै जिल्लालाई सूचना प्रविधिको क्षेत्रमा अगाडि बढाउन आग्रह गरे । उनले पाल्पाली सूचना तथा तथा सञ्चारप्रविधि क्षेत्रले कार्यक्रम आयोजना गरी प्रविधिमार्फत जागरण ल्याउने कार्यक्रम गरेकोमा बधाईसहित शुभकामना दिए ।

कार्यक्रममा बोल्दै क्यान पाल्पाका निवर्तमान अध्यक्ष तथा ५ नं. प्रदेशका सह–सचिव भोजराज भट्टराईले क्यानको उद्देश्य सूचना, सञ्चार र प्रविधिको विकाससँगै देशलाई समृद्ध बनाउनु रहेको जनाउँदै सवै आइटी क्षेत्रका क्रियाशिल संघ संस्था र व्यक्तिहरूलाई समेटेर अगाडि बढ्नुपर्ने बताए । उनले संघ सरकारले दिवसको रूपमा मान्यता दिएको सन्दर्भमा प्रदेश तथा स्थानीय सरकारले दिवसको सन्दर्भमा चासो दिदै समन्वयात्मक भूमिका खेल्नुपर्नेमा जोड दिए ।

कार्यक्रममा प्याब्सन पाल्पाका उपाध्यक्ष महेश बज्राचार्यले पाल्पाली सूचना प्रविधिको हव बनाउन आइटी व्यवसायीसँग प्याव्सन सहकार्य गर्न तयार रहेको जनाए । उनले प्याब्सनले सूचना तथा सञ्चार प्रविधिको प्रसस्त प्रयोग गर्दै विद्यालयहरूको कार्यक्रमलाई सहज बनाएको बताए ।
सोही कार्यक्रममा सिएस आइटीका महासचिव सुदिप पौडेलले क्यानले सूचना प्रविधिको क्षेत्रमा गरेको कार्यक्रमहरू प्रशंसनीय रहेको बताए ।

कार्यक्रमका अध्यक्ष क्यान महासंघ पाल्पाका अध्यक्ष महेश शर्माले कार्यक्रम सफल पार्न सहयोग गर्ने सवै संघ संस्थाहरूलाई धन्यवाद दिदै पाल्पाका सूचना तथा सञ्चार क्षेत्रको व्यापीकरण गर्न सरोकारवाला निकायहरूसँग सहकार्य गर्दै क्यान महासंघ पाल्पा अगाडि बढ्ने बताए ।
क्यान महासंघ पाल्पाका उपाध्यक्ष थमन सारूले स्वागत सहित सूचना तथा सञ्चारप्रविधिको प्रचार गर्दै व्यवस्थित प्रयोग गर्नुपर्नेमा जोड दिए ।

कार्यक्रम क्यान महासंघ पाल्पाका कार्यसमिति सदस्य गोपाल गैरेले सञ्चालन गरेका थिए । क्यान महासंघ पाल्पाले सूचना तथा सञ्चार प्रविधिको क्षेत्रमा विभिन्न कार्यक्रमहरू विगतदेखि नियमित रूपमा सञ्चालन गर्दै आइरहेको छ । हाल क्यान महासंघ पाल्पामा ४० बढी क्रियाशिल सदस्यहरू आवद्ध छन् ।