सुरक्षा निकायलाई सरकारको निर्देशन–‘हतियारसहित भेटिए गोली हान्नू’

चन्द विरुद्ध प्रदेशभरि अपरेसन 

३० फागुन, काठमाडौँ —सरकारले हतियार बोकेर हिँडेको फेला पारे गोली हान्न सुरक्षा निकायलाई निर्देशन दिएको छ । सरकारले चन्द समूहको गतिविधिमाथि प्रतिबन्ध लगाएसँगै प्रदेशभर सुरक्षा सतर्कता बढाइरेका बेला सुरक्षा निकायलाई यस्ते निदेशन दिएको हो ।

स्रोतका अनुसार आन्तरिक विज्ञप्तिमार्फत आएको सूचनामा ‘हतियारसहित फेला परे तत्काल फायर खोल्नू’ भनिएको छ । ‘चन्द समूहका कार्यकर्ता हतियारसहित हिँडेको फेला परे घुँडामुनि गोली हान्नेसम्मको निर्देशन छ,’ एक प्रजिअले भने ।

बिनाहतियार हिँडेको तर नेतृत्वमा रहेको कार्यकर्तालाई जहाँ भेटे पनि पक्राउ गर्न निर्देशन छ । त्यस्तै सामान्य कार्यकर्तामाथि पनि उच्च निगरानी राख्न निर्देश दिइएको छ । सरक्षाकर्मीलाई आफ्नो ज्यान, हतियार, कार्यालय, युनिटको सुरक्षा रणनीतिसहित सतर्क रहन भनिएको छ ।

एक डीएसपीका अनुसार हरेक जिल्लाका दुर्गम क्षेत्रमा सुरक्षा जनशत्ति बढाउने, गस्ती जारी राख्ने र विकास एवं सञ्चार संरचनाको सुरक्षामा विशेष सतर्कता राख्न पनि निर्देशन छ । चन्दका सामान्य कार्यकर्तालाई पनि पिछा गर्ने, बासस्थान निगरानी गर्ने र एक जिल्लादेखि अर्को छिर्ने सवारीमा समेत जाँच कडा पार्ने निर्देशन दिइएको छ ।

स्रोतका अनुसार चन्द समूहका नेता–कार्यकर्तालाई पछ्याउने, तर्साउने र मनोवैज्ञानिक दबाबमार्फत वार्तामा ल्याउने सरकारको रणनीति पनि रहेकाले त्यसैअनुसारका गतिविधि गर्ने सुरक्षा निकायको आन्तरिक सर्कुलर गरिएको छ ।

आन्तरिक सर्कुलरमा प्रहरीलाई एक जना मात्र बाहिर नहिँड्न, लामो गस्ती समूहमा हिँड्न, आफू जोगिएर फायर खोल्न भनिएको एक प्रहरी अधिकृतले बताए । प्रहरीका दुर्गमका सुरक्षा युनिटमा जनशक्ति बढाउनेदेखि आवश्यक परे सशस्त्र प्रहरीसँग पनि सहकार्य गर्न गृह मन्त्रालयको निर्देशन छ ।

रूपन्देहीका प्रहरी नायब उपरीक्षक धर्मराज भण्डारीले ग्रामीण क्षेत्रका सुरक्षा युनिटलाई पनि आफैंमाथि हुन सक्ने आक्रमणका लागि तयारी अवस्थामा बस्न निर्देशन गरिएको बताए । ‘सबै निर्देशन र रणनीति तय गरिएको छ,’ उनले भने, ‘हामीले रातो बत्ती बालिसकेका छौं ।’ चन्द समूहका जिल्लास्थित सबै पार्टी कार्यालय, निवास एवं बासस्थान खाली भइसकेको प्रहरीले जनाएको छ ।

चन्द समूहविरुद्ध प्रहरीले प्रदेशभरि विभिन्न खालका अपरेसन सञ्चालन गर्न थालेको प्रदेश ५ प्रहरी प्रमुख प्रहरी नायब महानिरीक्षक पीताम्बर अधिकारीले बताए ।