तिनाउ विकास बैंकले मनायो १३ औं बार्षिक उत्सव

उत्सवमा बुटवलमा रक्तदान, ५० यूनिट रगत संकलन

१५ कार्तिक, बुटवल । बुटवलमा केन्द्रीय कार्यालय रहेको तिनाउ विकास बैंक लिमिटेडले १३ औं बार्षिकोत्सव विभिन्न कार्यक्रम गरि मनाएको छ । रुपन्देही, नवलपरासी र चितवन तीन कार्यक्षेत्र रहेको बैंकले सामाजिक उत्तरदायित्व अन्तर्गत रक्तदान, छात्रबृति वितरण, आश्रमममा सहयोग तथा विभिन्न विद्यालयहरुलाई आर्थिक सहयोग गरेर बार्षिकोत्सव मनाएको हो ।

प्रधान कार्यालय बुटवलले बार्षिक उत्सवको अवसरमा रक्तदान कार्यक्रम गरेको छ । नेपाल स्वयसेवि रक्तदाता समाज रुपन्देहीसँगको सहकार्यमा बैंकले बुटवल ब्लड बैंकमा रक्तदान सम्पन्न गरेको छ । बैंकका कर्मचारी, सञ्चालक, स्वयसेवि रक्तदाताका सदस्य तथा अन्य शुभेच्छुक गरि ५० जनाले रक्तदान गरेका छन ।


रगतको अभाव हुन नदिनका लागि मानवीय सेवा गर्ने उदेश्यले सामाजिक उत्तरदायित्व अन्तरगत रक्तदान कार्यक्रम गरिएको बैंकका प्रमुख कार्यकारी अधिकृत प्रदीप कुमार श्रेष्ठले बताए । उनले १३ औं बार्षिक उत्सवमा तीन वटै जिल्लाका शाखाहरुले समेत विभिन्न कार्यक्रम गरेको जानकारी दिए ।


सोही अवसरमा नेपाल स्वयसेवि रक्तदाता समाज रुपन्देहीको अक्षयकोष सहयोगार्थ नगद २० हजार बैंकले प्रदान गरेको छ । बैंक सञ्चालक समितिका अध्यक्ष राजेन्द्र प्रसाद ओझाले स्वयसेवि समाजका अध्यक्ष कृष्ण चौहान क्षेत्रीलाई २० हजारको चेक हस्तान्तरण गरेका हुन । रक्तदान कार्यक्रममा सञ्चालक समिति सदस्य जीवन ओझा, रामेश्वर प्रसाद कसजु तथा अनिल प्रसाद श्रेष्ठले रक्तदाताहरुलाई प्रमाणपत्र प्रदान गरेका थिए ।


बार्षिकोत्सवकै अवसरमा बुटवल संगमपथ शाखाले बुटवल १३ देविनगर स्थित अपाङ्ग आश्रममा कम्बल वितरण गरेको छ । बुटवल बेल्बास शाखाले बेल्बास टोल विकास समितिलाई सय थान फोहोर फाल्ने डस्विन प्रदान गरेको छ । यसैगरि रुपन्देहीको छपिया शाखाले छपिया लिलाधर उच्च माविलाई २१ हजार सहयोग गरेको छ । जोगिकुटी शाखाले मणिग्राममा रहेको आत्मशान्ति अनाथ आश्रममा खाद्य सामाग्री प्रदान गरिएको छ ।


यस्तै विहिबार नै नवलपरासि बर्दघाट झिमिरेभार शाखाले रक्तदान गरेको छ । उक्त शाखाले गरेको रक्तदानमा ४० यूनिट रगत संकलन भएको छ । यसैगरि चितवन नारायणगढ शाखाले देवघाटमा खाना खुवाएको बैंकका सर्पोट डिभिजन प्रमुख कमल कंडेलले जानकारी दिए ।
बैंकले १३ औं बार्षिकउत्सव पछि पाल्पा जिल्लामा कार्यक्षेत्र विस्तारको योजना बनाएको प्रमुख कार्यकारी अधिकृत श्रेष्ठले बताए ।

बैंकले १२ प्रतिशत बोनस सेयर वितरण गर्ने भएको छ । सेयर वितरणपछि ५० करोड ६९ लाख चुक्ता पूँजी रहेको बैंकको ५६ करोड ७२ लाख पुग्ने छ । बैंकको निक्षेप संकलन ५ अरब ७ करोड, कर्जा लगानी ४ अरब १८ करोड रहेको छ । बैंकले १५ वटा शाखा, ८ वटा एटिएम र मोबाईल बैंकिङ्ग सेवा दिदै आएको छ ।